安信當年嘅「安信兄弟」廣告可謂深入民心，雖然廣告已經冇咗，但提起借錢兄弟，唔少人仍會諗起「安信兄弟」，就連組合農夫首《全民皆估》都有得唱，「有對兄弟會借錢～」。
噚日就出現咗一對「真．借錢兄弟」嘞，康業信貸快遞行政總裁兼MoneySQ.com創辦人李根泰(左，Steven)，同埋佢做開集資炒鋪位嘅細佬盛滙創辦人李根興(Edwin)，一齊搞眾籌網貸平台，用眾籌集資番嚟嘅錢再借出去。
呢對「真．借錢兄弟」認真夠出位，噚日一綠一橙咁主持記者會，唔知佢哋搞乜生意，都會對佢哋留下印象。佢哋堅有心思，Steven着螢光綠西裝撞橙色袋巾，細佬就調番轉，非常搶眼。
據了解，佢兩兄弟拍住上，憑本身嘅人脈搞眾籌，3個月就成功從一班親朋戚友、叔伯兄弟手上吸金2億元。Edwin話，今次只係「小試牛刀」咋。